Naatsorsueqqissaartarfiup ukioq manna ilinniartitaanermut kisitsisitigut paasissutissat allilerpai, massakkullu Kalaallit Nunaanni ilinniakkat 2003-mit 2015-imut ilinniarfinnut agguataarlugit takuneqarsinnaanerat periarfissaalerpoq. Saqqummersitami uani Kalaallit Nunaanni inuusuttunut ilinniarfiit kisimik pineqarput, kisiannili suli Kalaallit Nunaata avataani inuusuttunut ilinniarfinni ilinniartunut paasissutissat Naatsorsueqqissaartarfiup Kisitsisaataasiviani aaneqarsinnaapput.
Ataani titartagaq 1.-imi takuneqarsinnaapput Kalaallit Nunaanni inuusuttunut ilinniarfinni ilinniarnerit aallartinneqartut, ilinniarnertuunngorniarfinnut aammalu inuussutissarsiornermi ilinniarfinnut agguaallugit.
2015-imi ilinniarnerit aallartinneqartut 1.579-iusimapput.
Titartagaq 1. 2006-imit 2015-imut Kalaallit Nunaanni ilinniarnerit aallartinneqartut
Najoqqutaq: Naatsorsueqqissaartarfik- Kisitsisaataasivimmi kisitsisit takukkit (http://bank.stat.gl/UDDISC11E).
2013-imit qummullu Kalaallit Nunaanni inuussutissarsiornermi ilinniarfinni ilinniarnerit aallartinneqartut amerleriarsimapput, 2015-imilu 872-inik amerlatigisimallutik.
Kalaallit Nunaanni ilinniarnertuunngorniarfinni ilinniarnerit aallartinneqartartut 2006-imili amerliartorusaarsimagaluartut 2015-imi 2014-imut sanilliullugit annikitsumik ikileriaateqarsimapput. 2015-imi ilinniarnerit aallartinneqartut 707-iusimapput.
Aallartittut agguaqatigiissillugit ukiui amerleriarsimapput, 2015-imilu ilinniarnertuunngorniarfinni inuussutissarsiornermilu ilinniarfinni atuartut agguaqatigiissillugit 21-nik 27-nillu ukioqarsimapput. Taakku 2011-mut sanilliullugit missiliorlugu ukiunik marlunnik utoqqaanerupput.